ქუჩის ძაღლს მუცლიდან ძვირად ღირებული ოქროს სამკაული ამოუღეს

აშშ-ის ფლორიდის შტატში ვეტერინარულ კლინიკაში ძაღლი მიიყვანეს, რომელსაც კუჭში ძვირად ღირებული ოქროს სამკაული აღმოაჩნდა. ამის შესახებ გამოცემა Newsweek წერს.

ხუთი წლის ედვარდი თავშესაფრიდან ვეტერინარებთან დაზიანებული თათით მიიყვანეს. ძაღლის გასინჯვისას ექიმებმა მოულოდნელად კიდევ ერთი პრობლემა აღმოაჩინეს — მის კუჭსა და მსხვილ ნაწლავში უცხო საგნები იყო გაჭედილი.

ვეტერინარებმა ედვარდის მდგომარეობა კრიტიკულად შეაფასეს და გადაუდებელი ოპერაციის ჩატარება გახდა საჭირო. ოპერაციის დროს ძაღლის მუცლიდან 750 სინჯის ოქროს ყელსაბამი ამოიღეს. უცნობია, სად და როგორ გადაყლაპა ედვარდმა სამკაული.

ასევე ცნობილია, რომ ძაღლს კიდევ ერთი ოპერაცია ელოდება, დაზიანებული თათის ამპუტაცია. ანემიის გამო ექიმებმა ერთდროულად ორი ოპერაციის ჩატარება ვერ შეძლეს.

ამჟამად ედვარდი ვეტერინარების მეთვალყურეობის ქვეშ გამოჯანმრთელების პროცესს გადის. მათი თქმით, ძაღლი თავს კარგად გრძნობს, ტკივილი არ აწუხებს და თავისუფლად გადაადგილდება.