აშშ-მა ერაყსა და სირიაში ირანულ ობიექტებზე იერიშების გეგმა დაამტკიცა

ამერიკის შეერთებულმა შტატებმა ერაყსა და სირიაში ირანულ ობიექტებზე იერიშების გეგმა დაამტკიცა. ამის შესახებ ინფორმაციას CBSNews-ი ამერიკელ მაღალჩინოსნებზე დაყრდნობით ავრცელებს. ტელეკომპანიის მიერ მოპოვებული ინფორმაციით, ავიაიერიშები რამდენიმე დღე გაგრძელდება.

ვაშინგტონმა აღნიშნული გეგმა მას შემდეგ დაამტკიცა, რაც რამდენიმე დღის წინ, იორდანიაში დრონებით თავდასხმას სამი ამერიკელი ჯარისკაცი ემსხვერპლა. ამერიკის შეერთებულმა შტატებმა თავდასხმაში ირანის მიერ მხარდაჭერილი დაჯგუფება დაადანაშაულა. თუმცა, თეირანი დრონებით თავდასხმასთან რაიმე კავშირს, კატეგორიულად უარყოფს.