ვინ არის უცხოელი ბიზნესმენი, რომელიც ამტკიცებს, რომ ქართველებმა მილიონიანი ქონება დასტყუეს

18:48 09-06-2019
11191

ერთ-ერთმა იაპონურმა კომპანიამ, საქართველოში სასოფლო–სამეურნეო საქმიანობის წამოწყების მიზნით, მიწები შეისყიდა. იმის გამო, რომ საქართველოს კანონმდებლობის მიხედვით, უცხოელს საკუთარ სახელზე ქონების გაფორმება არ შეუძლია, კომპანიის უფროსმა – სავადა ჰიდეომ ის საქართველოში არსებული, ქართული კომპანიის წარმომადგენლებზე გურამ ხეოშვილსა და მის პარტნიორზე – ალექსანდრე კალაძეზე გააფორმა, რომელთაც ევალებოდათ მიეხედათ სამეურნეო საქმიანობისთვის, გაეკონტროლებინათ ხარჯები და იქ მომუშავე პირთათვის ხელფასი გადაეხადათ, რისთვისაც იაპონური კომპანია მათ ყოველ თვე 4000$–ს უხდიდა.

როგორც სავადა მოგვითხრობს, გარკვეული დროის შემდეგ, აღმოაჩინა, რომ ქართული მხარე დაკისრებულ მოვალეობებსა და პირობებს სათანადოდ არ ასრულებდნენ და მას მერე, რაც ამისთვის საყვედური მიიღეს, დაიწყეს ფულის სათავისოდ გამოყენება, ხარჯების დამალვა და ტყუილების მოგონება, რის გამოც იაპონურმა მხარემ დაკარგა მათი ნდობა და გადაწყვიტა გურამი და ალექსანდრე საქმიანობიდან ჩამოეშორებინა და ყველაფერი სხვა პიროვნებაზე გადაეფორმებინა. ეს დაავალეს ვინმე ილიას, რომელიც იმ დროს, იმ კომპანიის წარმომადგენელი იყო. სავადას თქმით, ილიამ დაიწყო პროცესი, მაგრამ გურამმა და ალექსანდრემ იგი სამსახურიდან გაათავისუფლეს, შესაბამისად, მიწების გადაფორმების პროცესიც შეჩერდა.

სავადა ჩვენთან საუბრისას აღნიშნავს: „გურამ ხეოშვილმა და ალექსანდრე კალაძემ გადაწყვიტეს, რომ მიწა მათი იყო და გამოაკრეს განცხადებები – უცხო პირთა შესვლა აკრძალულია. არ უშვებდნენ არც იაპონურ მხარეს და არც იქ მომუშავე პერსონალს, ხელს უშლიდნენ მიწის მოვლასა და დამუშავებაში. მათ განაცხადეს: თუ ჩვენ აღარ გვავალებ ამ სამუშაოს, მაშინ მიწის ერთ ნაწილს (ერთ მილიონ იენზე მეტი ღირებულების მიწა, სადაც უამრავი ატმის ხე იყო გაშენებული) ჩვენ დავიტოვებთ და არ დაგიბრუნებთო (ერთი იენიც არ გადაუხდიათ და ერთ მილიონიან მიწას ითხოვდნენ), ასევე გადაგვიხადეთ ჩვენი დახარჯული ენერგიისთვის ანაზღაურებაო (ყოველთვე $4000 არ ჰყოფნიდათ) ან კიდევ ჩვენ გადაგიხდით თანხას და ეს მიწა დაგვიტოვეო. მოკლედ, მათ გამო შეჩერდა სამუშაოები და ატმისა და ყურძნის მოსავალი ვერ ავიღეთ. ამ მიწაზე დაიხარჯა უამრავი თანხა და დრო ჭის გასათხრელად, ტუალეტების ასაშენებლად, ღობის გასაკეთებლად, ასევე, ხელფასები ყველა იქ მომუშავე პიროვნებას. სამწუხაროდ, მიწაზე სამუშაოების აკრძალვის შემდეგ, ვიზარალეთ ძალიან დიდი თანხა და პროდუქტი. მიწის დაბრუნების შესახებ, ადვოკატისგან რამდენჯერმე გაეგზავნათ წერილი და გაფთხილება, მაგრამ გურამ ხეოშვილი და ალექსანდრე კალაძე აცხადებენ, რომ დააბრუნებენ ყველა მიწას, შაქრიანის მიწის გარდა. რაზეც პასუხად მიიღეს, რომ შაქრიანის მიწის თანხასთან ერთად, იქ განხორციელებული სამუშაოების ხარჯი 31,492 აშშ დოლარიც გადაეხადათ (ჭა, ტუალეტი, ღობე და ა.შ). ქართულმა მხარემ კი ბოლოს განაცხადა – არც 31,492 $-ს დაგიბრუნებთ და არც მიწას გადმოგიფორმებთო. თავიდან კი შეთანხმება სულ სხვანაირი იყო – რადგანაც ჩვენ არაფერი გადაგვიხდია და ყველაფერი თქვენი ხარჯით კეთდება, დაგეხმარებით, მიწებს მივხედავთ, შეგიძლიათ გვენდოთო, მაგრამ ყველაფერი ტყუილი აღმოჩნდა. ახლა ახალი მიწები ვიყიდეთ სხვა ადგილას და სულ თავიდან დავიწყეთ ყველაფრის გაკეთება. უბრალოდ, გვინდოდა გაგვეფრთხილებინა ყველა უცხოელი, ვინც საქართველოში ბიზნესის დაწყებას დააპირებს, რომ ასეთი ადამიანებიც არსებობენ და ფრთხილად იყვნენ, სანამ ვინმეს ენდობიან. დიდი იმედი გვაქვს, რომ ასეთი შემთხვევა მეტჯერ არ განმეორდება“.

იაპონელი ბიზნესმენი ამ თემაზე ექსკლუზიურად „პრაიმტაიმს“ ვრცლად ესაუბრა:

სავადა ჰიდეო:

- გურამ ხეოშვილი და ალექსანდრე კალაძე ქართველი მეწარმეები არიან. თავდაპირველად, გურამი აონოსგან გავიცანი, სწორედ მათ ჰქონდათ კავშირი. აონოს საქართველოდან ღვინის იაპონიაში შემოტანა უნდოდა და ვინაიდან, მას ამისათვის საკმარისი თანხა არ ჰქონდა, მე დამიკავშირდა, ფული მთხოვა, მივეცი და გადაიხადა. თუმცა, გურამმა ღვინო იაპონიაში არ გამოგზავნა. ამაზე ძალიან გავბრაზდი და გურამს ვეჩხუბე კიდეც, რა წესია, როგორ იქცევი–მეთქი? მას აონომაც უსაყვედურა, გიჩივლებთ, თუ თანხას არ დააბრუნებო. ამის შემდეგ, გურამმა თანხის მხოლოდ ნაწილი დააბრუნა, ღვინო კი მაინც არ გამოგზავნა. იმ ეტაპზე თავი დავანებეთ და აღარ ვუჩივლეთ.

- რა არგუმენტებს ასახელებდნენ? რატომ არ აბრუნებდნენ თანხას?

- კონკრეტულ მიზეზებს არ ამბობდა, ერთადერთი ის თქვა, რომ დანარჩენი თანხა იაპონია–საქართველოს შორის მიმოსვლისთვის გამოვიყენეო. თუმცა, ის ღვინის ფული იყო და არა მისი საგზაო ხარჯების ასანაზღაურებელი. ეს ყველაფერი აონოსთან შეგვიძლია გადავამოწმოთ, ისიც დაადასტურებს.

სულ თავიდან, გურამისგან 10 ათასი ბოთლი ქართული ღვინო შევიძინე. შემდეგ, საქართველოში მეღვინეობის დასათვალიერებლად წამოვედი და როდესაც ვნახე, რომ ქართული მიწები იაფად იყიდებოდა, ვიფიქრე შევიძენ–მეთქი, რადგან სურვილი მანამდეც მქონდა, რომელიმე უცხო ქვეყანაში სოფლის მეურნეობის მიმართულებით საქმიანობა წამომეწყო. რაკიღა საქართველოში ასეთი ხელსაყრელი ვარიანტი აღმოვაჩინე და მიწები იაფი ღირდა, გადავწყვიტე, შემეძინა. თანაც, ნოყიერი მიწაა, გემრიელი ხილი და ბოსტნეული მოდის. მოკლედ, 90 ჰექტარი სასოფლო–სამეურნეო დანიშნულების მიწა შევიძინე სოფელ შაქრიანშიგრემში, ქვემო მაჩხაანსა და მატანში.

- თუკი გურამმა ღვინოსთან დაკავშირებულ ამბავზე მოგატყუათ, როგორც თქვენ ამბობთ, რატომღა განაგრძეთ მასთან თანამშრომლობა მიწების საკითხზე?

- ვინაიდან საქართველოში სხვა არავისთან მქონდა კონტაქტი, ისევ მას ვენდე. თანაც, გურამი ორ მიზეზს ასახელებდა – აონო გამოიყვანა ცუდი, მას აბრალებდა, მან არ წაიღო ჩემგან ღვინო და ქართველი მეღვინეები დაზარალდნენ, ცუდ დღეში არიანო. ამიტომაც ვიყიდა ის 10 ათასი ბოთლი, რომ ის მეწარმეები რაღაცნაირად „გადავარჩინოთო“. ჩემი ჭკუით, დავეხმარე მათ.

- ახლა სასამართლოში შეტანილია საჩივარი თუ რა ეტაპზეა თქვენი უთანხმოება?

- ახლა ადვოკატი გვყავს აყვანილი და ის აგროვებს საჭირო საბუთებს, სასამართლოში სარჩელი ჯერ არ შეგვიტანია, გურამი კი გავაფრთხილეთ, რომ კუთვნილი მიწები დროულად გადმოგვიფორმოს, რაშიც საკმაოდ დიდი თანხა გადაგვახდევინა, ან ყველაფერი დააბრუნოს, რაც გადავიხადეთ. მიწები მთლიანად გურამის სახელზეა, რადგან ქართული კანონმდებლობის თანახმად, მოგეხსენებათ, უცხოელს არ შეუძლია სასოფლო–სამეურნეო მიწის შეძენა. გურამი დაგვპირდა, რომ შაქრიანის მიწის ფულს გადაგიხდით და დანარჩენგან კი თვითონ იმ მიწას დაგიბრუნებთო. მაგრამ შაქრიანის მიწაზე გვაქვს ბევრი ფული დახარჯული და ვინ აგვინაზღაურებს იმ ხარჯებს? მოკლედ, მან ბოლოს ისიც კი გვითხრა, არც მიწას დაგიბრუნებთ და არც თანხას გადაგიხდითო. ახლა ამაზეა ჩვენ შორის დავა. ჩვენ ყველანაირი დამადასტურებელი საბუთი გვაქვს, რა თანხებიც გადავურიცხეთ გურამს. ჩვენს ინტერესებს „თორაძე და პარტნიორები“ იცავს.

- რა არის თქვენი მთავარი სათქმელი, მოთხოვნა, მიმართვა საზოგადოების თუ სახელმწიფოსადმი? რის გამოც დამიკავშირდით.

- პირველ რიგში, მინდა აღვნიშნო, ის, რომ უცხოელებს მიწების საკუთარ სახელზე ყიდვა და გაფორმება არ შეუძლიათ, ძალიან დიდი პრობლემაა. თუნდაც, 20%–ის ან რაღაც ნაწილის გაფორმება რომ შეიძლებოდეს, ასე მოტყუებულები აღარ დავრჩებოდით და ჩვენთვის ეს შეღავათი იქნებოდა. იაპონელებისთვის პრობლემა ის არის, რომ საქართველოს შესახებ ბევრი ინფორმაცია არ გვაქვს და შესაბამისად, მეც არაფერი ვიცოდი, ბრმად ვენდე პირველსავე ნაცნობ ქართველს, იმ ადამიანს, ვინც იაპონური იცოდა და რასაც ის მეუბნებოდა, ყველაფერი მჯეროდა, მის სიმართლეში ეჭვი არ შემქონდა. არც ინგლისური ვიცი და მანდ არც სხვა ნაცნობი მყავდა. ასე დავრჩი მოტყუებული და დაზარალებული. ვერც ისეთი ორგანიზაცია ვნახე, რომელიც უცხოელებს ამ მიმართულებით ეხმარება და ჩემს უფლებებს დაიცავდა. მიუხედავად იმისა, რომ ამდენი ფული დავხარჯე, შემიძლია დავასკვნა, რომ საქართველოში მილიარდებიც რომ დახარჯოს ადამიანმა და საქმეში ჩადოს, ძალაუფლება და გარანტია არ აქვს იმისა, რომ ის მოტყუებული არ დარჩება. გგონია, რომ მიწა შენია, წამოიწყებ საქმეს, მაგრამ კანონით ის სხვას ეკუთვნის და შენ მასზე არანაირი უფლება არ გაქვს. მჯერა, რომ საქართველოში კარგი ადამიანებიც ცხოვრობენ და უცხოელისთვის ყველა ცუდი არ იქნება, მაგრამ ჩვენ ხომ ვერ გავიგებთ თავიდან ვინ კარგია და ვინ ცუდი? გურამმა კი ასე გამოგვძალა ფული. კარგი იქნებოდა, რაიმე ორგანიზაცია არსებობდეს, რომელიც დაგვეხმარება. იაპონელები ყველას ბრმად ვენდობით, ყველა კეთილსინდისიერი და პატიოსნად მომუშავე გვგონია და ასე მოქცევა არ შეიძლება.

- რაიმე ხელშეკრულება თუ გაქვთ გურამ ხეოშვილთან და ალექსანდრე კალაძესთან გაფორმებული?

- კი, ხელშეკრულება გავაფორმეთ, მაგრამ როგორც შემდეგ აღმოჩნდა, აზრი არ ჰქონდა. ის კაცი, რომელიც გვეხმარებოდა, გურამმა სამსახურიდანაც კი გააგდო. ვინც გზაზე გადაეღობება და ხელს უშლის, ყველას თავიდან იშორებს. ვისურვებდი, იქნებ კანონში გარკვეული ცვლილებები შეიტანონ, ასეთ საკითხებთან მიმართებაში, რადგან ეს ისევ საქართველოსთვის, მცირე მეწარმეობის განვითარებისთვის იქნება კარგი, რომ უცხოელი ინვესტორიც დაცული იყოს და ქართველი პარტნიორიც.

- საერთო ჯამში რა თანხაზეა საუბარი?

- მილიონზე მეტი ლარი. საელჩოში ვიკითხეთ, თუ რისი გაკეთება შეიძლებოდა, გვითხრეს, რომ მიწებთან დაკავშირებით მსგავსი შემთხვევები სხვა დროსაც მომხდარა, ოღონდ როგორ მოაგვარეს, არ ვიცით. ანუ, ხშირია, როდესაც ქართველები უცხოელებს ატყუებენ და გამოვა ისე, რომ იაპონელები საქართველოში აღარაფერს გააკეთებენ.

- თქვენ რა საქმიანობას ეწევით იაპონიაში?

- მე მაქვს კომპანია, რომელიც ქიმიკატებისგან, მავნე ბაქტერიებისაგან და ვირუსებისგან დაბინძურებულ მიწებს ასუფთავებს, უფრო ნაყოფიერს, ნოყიერს ხდის, რომ შემდეგ მასზე კარგი მოსავალი მოვიდეს. გარდა ამისა, ამა თუ იმ ადგილას, სანამ შენობას ააშენებენ, ვამოწმებთ, რამდენად მყარია იქ მიწა.

„პრაიმტაიმი“, გურამ ხეოშვილს პირადად დაუკავშირდა და სატელეფონო საუბრისას, მას რამდენიმე შეკითხვა დავუსვით.

- ბატონო გურამ, მე დამიკავშირდა იაპონელი ბიზნესმენი – სავადა ჰიდეო, რომელიც ამბობს, რომ საქართველოში თქვენი მეშვეობით შეიძინა მიწის ნაკვეთები, რომლებიც თქვენს სახელზეა გაფორმებული, მაგრამ თქვენ ის მოატყუეთ, ვერანაირი სარგებელი ვერ მიიღო და თანხის დაბრუნებას მოითხოვს. თქვენი პოზიცია გვაინტერესებს, როგორ მოხდა თქვენი ერთმანეთთან დაკავშირება და ადასტურებთ თუ არა, რომ მართლაც შეიძინეთ მიწის ნაკვეთები მისი ფულით? ნაკისრი ვალდებულებები შეასრულეთ?

- ეს სიმართლეს არ შეესაბამება. ნამდვილად არ არის ასე. მოტივი კი ნამდვილად არ ვიცი, თქვენ რატომ დაგიკავშირდათ.

- გარდა ამისა, საუბარია ღვინოზეც, რომელიც მისთვის უნდა გაგეგზავნათ, მაგრამ ამაშიც რაღაცამ შეგიშალათ ხელი.

- რომელ ღვინოზეა საუბარი? ღვინის გაგზავნაზე მასთან საუბარი არ მქონია. წლების წინ გვქონდა რაღაც, თუმცა, ღვინოზე გავჩერდით. სულ სხვა საქმიანობას ვეწეოდით, რაზეც უთანხმოება მოგვივიდა და ასე თუ ისე გავერკვიეთ ამ საკითხში. ოღონდ ღვინოსთან კავშირში არ არის.

- რა საქმით დაიწყო თქვენი თანამშრომლობა?

- ღვინით დაიწყო, მაგრამ მერე ორივე შევეშვით და სხვა საქმიანობა გავაგრძელეთ. ამიტომ არაფერ შუაშია ღვინო.

- ბატონო გურამ, როდესაც ადამიანი საჯაროდ გამხელთ და ბრალს გდებთ, თქვენსავე ინტერესებში უნდა შედიოდეს პასუხის გაცემა და თქვენი სიმართლის ასევე საჯაროდ დაფიქსირება, ხომ ასეა? არ გახსოვთ როგორ გაიცანით თქვენი ბიზნესპარტნიორი და რა შეთანხმება გქონდათ მასთან?

- გახსენება არ მჭირდება, უბრალოდ, ახლა ამის დრო არ მაქვს. ცოტა ხანში გადმოგირეკავთ.

 ჩვენი საუბარი რამდენიმე საათის შემდეგ გაგრძელდა.

გურამ ხეოშვილი:

- არ ვიცი, რა ხდება, ჩემთვის ეს მდგომარეობა გაურკვეველია, მე არავინ დამკავშირებია. ღვინო არაფერ შუაშია.

- უნდა ეყიდა თუ არა სავადა ჰიდეოს თქვენგან ღვინო ვინმე აონოს მეშვეობით?

- პირადად ამ პიროვნებასთან არანაირი პრობლემა არ მქონია ღვინოსთან დაკავშირებით, ორი წლის წინ ღვინო გავუგზავნე კიდეც. ამის შემდეგ, ღვინის საკითხზე მასთან კავშირი არ მქონია.

- მიწებზე ხომ არის საუბარი, რომლებიც თქვენზეა გაფორმებული, თანხა კი მან გადაიხადა და ამის დამადასტურებელი შესაბამისი დოკუმენტაციაც აქვს.

- ეს საბუთი მეც მაქვს და მასაც, დიახ.

- ამ ეტაპზე, რა არის თქვენ შორის პრობლემა? როგორ ფიქრობთ, რატომ დაგვიკავშირდა ჰიდეო?

- არ ვიცი, მე ვთვლი, რომ ეს მისი პირადი ახირებაა.

- მან დახმარებისთვის საელჩოსაც მიმართა და ადვოკატიც აიყვანა, რომ გიჩივლოთ.

- უნდა იჩივლოს და რაც უნდა ის გააკეთოს.

- მე ვალდებული ვიყავი, საქმის კურსში ჩამეყენებინეთ ინტერვიუსთან დაკავშირებით და საშუალება მომეცა, თქვენი პოზიცია დაგეფიქსირებინათ. დიდ თანხებზეა საუბარი. მიწების შეძენის შემდეგ რა მოხდა? რაზე იყავით შეთანხმებულები და რა პირობები დაირღვა?

- თუ მას ჩემთან რაიმე პრეტენზია აქვს, მე მომმართოს და არ მესაუბროს პრესის მეშვეობით. პირადად ყველაფერზე გავცემ პასუხს. ვადასტურებ, რომ მისი ფულით საქართველოში მიწის ნაკვეთები შევიძინეთ. ამას არ უარვყოფ, დასამალი არაფერია.

 

ავტორი: თამთა დადეშელი