მსოფლიო • 1714030148

დედა 2 წლის შვილის გაყიდვის მცდელობის დროს დააკავეს (დნიპრო)

ქალაქ დნიპროში, სამართალდამცველებმა, შვილის გაყიდვის მცდელობის დროს, უკრაინელი ქალი დააკავეს. პროკურატურის ინფორმაციით, 19 წლის დედა საკუთარი ორი წლის შვილის გაყიდვას დაახლოებით 25 ათას დოლარად ცდილობდა.ახალგაზრდა ქალის აყვანა უშუალოდ ბავშვის გაყიდვის მცდელობის დროს მოხდა. დაკავებულს ბრალი ოფიციალურად არასრულწლოვანით ვაჭრობაში წაუყენეს. ეს მუხლი, ქონების კონფისკაციასთან ერთად, 15 წლამდე პატიმრობას ითვალისწინებს.

პოლიტიკა • 1714030084

როგორც კი გამოაშკარავდა, რომ ბიძინა ივანიშვილი საკუთარი ქვეყნის ინტერესებს ანიჭებდა უპირატესობას, დასავლეთმა გაააქტიურა სააკაშვილის პოლიტიკური ძალის მხარდაჭერა და უკვე ღიად იბრძვის ხალხის მხარდაჭერილი ოცნების ხელისუფლების დასამარცხებლად - ნანა კაკაბაძე

„საქართველოს თითქმის მთელი ისტორიის მანძილზე დიდი სახელმწიფოები მუდმივად ცდილობდნენ აქ ჰყოლოდათ ისეთი ხელისუფლება, რომელიც მათი ბრძანებების უსიტყვო შემსრულებელი იქნებოდა. ამასთან, იშვიათი იყო შემთხვევა, როდესაც უცხო ძალას ჩვენი სახელმწიფოებრიობა მთლიანად გაეუქმებინა და თუნდაც დანაწევრებულ ქვეყანას, არ ჰყოლოდა ქართველი მმართველები“-ამის შესახებ არასამთავრობო ორგანიზაციის, „ყოფილი პოლიტპატიმრები ადამიანის უფლებებისთვის“ დამფუძნებელი, ნანა კაკაბაძე სოციალურ ქსელში წერს.კაკაბაძის თქმით, ბიძინა ივანიშვილის ხელისუფლება პირველ ხანებში დასავლეთის მხარდაჭერით სარგებლობდა, მაგრამ როგორც კი გამოაშკარავდა, რომ ის საკუთარი ქვეყნის ინტერესებს, დასავლეთის ინტერესებზე პრიორიტეტულად მიიჩნევდა და როცა ეს ინტერესები არ ემთხვეოდა დასავლეთის ინტერესებს, საკუთარი ქვეყნის ინტერესებს ანიჭებდა უპირატესობას, მოხდა დასავლეთის მხარდაჭერის თანდათან შემცირება.მისი თქმით, რუსეთ-უკრაინის ომი დასავლეთთან ჩვენი ურთიერთობების გარდამტეხი აღმოჩნდა, ვინაიდან აღმოჩნდა, რომ დასავლეთს ამ ომში საქართველო ისეთ აქტიურ ანტირუსულ მხარედ წარმოედგინა, რომელიც არათუ სანქციებს დაუწესებდა რუსეთს, არამედ ოფიციალურად სამხედრო და ცოცხალი ძალით დაეხმარებოდა უკრაინას ან აქ, ოკუპირებულ ტერიტორიებზე გაუხსნიდა მეორე ფრონტს.მისივე თქმით, როდესაც გაირკვა, რომ საქართველოს ხელისუფლებამ ამაზე უარი განაცხადა, დასავლეთმა გაააქტიურა მათი ფავორიტი სააკაშვილის პოლიტიკური ძალის მხარდაჭერა და უკვე ღიად იბრძვის ხალხის მხარდაჭერილი ოცნების ხელისუფლების დასამარცხებლად.„როგორი ხელისუფლება სჭირდება უცხო ძალას საქართველოში საქართველოს თითქმის მთელი ისტორიის მანძილზე დიდი სახელმწიფოები მუდმივად ცდილობდნენ აქ ჰყოლოდათ ისეთი ხელისუფლება, რომელიც მათი ბრძანებების უსიტყვო შემსრულებელი იქნებოდა. ამასთან, იშვიათი იყო შემთხვევა, როდესაც უცხო ძალას ჩვენი სახელმწიფოებრიობა მთლიანად გაეუქმებინა და თუნდაც დანაწევრებულ ქვეყანას, არ ჰყოლოდა ქართველი მმართველები. აღმოსავლეთ და დასავლეთ საქართველოს საკუთარი მეფეები ან მთავრები ჰყავდა, რომლებიც მეზობლების სიძლიერის მიხედვით, ატარებდნენ პრო-სპარსულ, პრო-ბიზანტიურ, პრო-არაბულ პრო-მონღოლურ, პრო-თურქულ ან სხვა პოლიტიკას. ხშირად ისეც ხდებოდა, რომ ქართული სამთავროები ერთმანეთს იმის მიხედვით ებრძოდნენ, თუ რომელი ძლიერი მეზობლის გავლენის ქვეშ იმყოფებოდნენ, ამბობდნენ, რომ სწორედ ის ძლიერი მეზობელი იყო იმ მომენტში ჩვენი ქვეყნის (ან მისი ნაწილის) მხსნელი და სიკეთის მომტანი. სინამდვილეში კი ისინი იმ დიდი ქვეყნების იარაღს წარმოადგენდნენ.საქართველოს სახელმწიფოებრიობა ბოლოს რუსეთმა გააუქმა და ის რუსეთის იმპერიის ნაწილად აქცია, რომლის დაშლის და საქართველოს დამოუკიდებლობის მოპოვების შემდეგ ბუნებრივია, გაგრძელდა დიდი ქვეყნების ბრძოლა საქართველოში პრო-უცხო ძალის ინტერესების გამტარებელი ხელისუფლების დასამკვიდრებლად. ბუნებრივია, ჩვენი ყველა დიდი მეზობელი თუ არამეზობელი დღესაც ჩაბმულია ამ ბრძოლაში, რადგან ყველას თავისი ინტერესები ამოძრავებს საქართველოში. საბჭოთა კავშირის დაშლის შემდეგ ყველა ხელისუფლება ცდილობდა მისაღები ყოფილიყო იმ ძალისათვის, საიდანაც შეიძლებოდა ხელისუფლების მიღება და შენარჩუნება. თავის მოწონება-შეთაზების მიმართულებით ყველაზე მეტი მონდომება, სააკაშვილის ხელისუფლებამ გამოიჩინა. ის ყველა საკითხში საქართველოს ინტერესებზე წინ დასავლეთის ინტერესებს აყენებდა. სააკაშვილი ჩვენს ქვეყანას სთავაზობდა დასავლეთს, მათი ბუნებრივი მეტოქის, რუსეთის წინააღმდეგ ბრძოლის იარაღად. ამის სანაცვლოდ, დასავლეთი თვალს ხუჭავდა სააკაშვილის რეჟიმის მმართველობის ანტიდემოკრატიულ ფორმებზე და მეთოდებზე. ამ კუთხით სააკაშვილის ხელისუფლება თანდათან იმდენად ოდიოზური და ქართველი ხალხისთვის მიუღებელი გახდა, რომ 2012 წლის შემდეგ, დასავლეთმა ვეღარ შეძლო მისი შენარჩუნება.ივანიშვილის ხელისუფლება პირველ ხანებში დასავლეთის მხარდაჭერით სარგებლობდა, მაგრამ როგორც კი გამოაშკარავდა, რომ ის საკუთარი ქვეყნის ინტერესებს, დასავლეთის ინტერესებზე პრიორიტეტულად მიიჩნევდა და როცა ეს ინტერესები არ ემთხვეოდა დასავლეთის ინტერესებს, საკუთარი ქვეყნის ინტერესებს ანიჭებდა უპირატესობას, მოხდა დასავლეთის მხარდაჭერის თანდათან შემცირება. რუსეთ-უკრაინის ომი დასავლეთთან ჩვენი ურთიერთობების გარდამტეხი აღმოჩნდა, ვინაიდან აღმოჩნდა, რომ დასავლეთს ამ ომში საქართველო ისეთ აქტიურ ანტირუსულ მხარედ წარმოედგინა, რომელიც არათუ სანქციებს დაუწესებდა რუსეთს, არამედ ოფიციალურად სამხედრო და ცოცხალი ძალით დაეხმარებოდა უკრაინას ან აქ, ოკუპირებულ ტერიტორიებზე გაუხსნიდა მეორე ფრონტს.როდესაც გაირკვა, რომ საქართველოს ხელისუფლებამ ამაზე უარი განაცხადა, დასავლეთმა გაააქტიურა მათი ფავორიტი სააკაშვილის პოლიტიკური ძალის მხარდაჭერა და უკვე ღიად იბრძვის ხალხის მხარდაჭერილი ოცნების ხელისუფლების დასამარცხებლად.ჯერ „მომაკვდავი სააკაშვილის“ გადარჩენის, ხოლო შემდეგ ე. წ. რუსული კანონის თემაც სწორედ ამ ბრძოლის ნაწილია. სიმპტომატურია ისიც, რომ ამ თემის ამგორებელი პოლიტიკოსები, ენჯეოები და სტუდენტები ერთხმად აცხადებენ, არ გვაინტერესებს რა წერია კანონშიო.ეს პოზიცია ლოგიკური იქნებოდა იმ შემთხვევაში, თუ ისინი არ მოინდომებდნენ ამ კანონ-პროექტის არც მხარდაჭერას და არც გაპროტესტებას. იქნებოდნენ სახლებში და იქიდან თვალს ადევნებდნენ მოვლენებს. მაგრამ როცა გამოდიხარ ქუჩაში, პროტესტით, მზად ხარ წიწაკიანი გაზის შესუნთქვისთვის და შინაარსი არ გაინტერესებს, ასეთ შემთხვევაში ან ზომბი ხარ, ან უცხო ქვეყნის ინტერესების თუ დაკვეთის შემსრულებელი. სხვა ახსნა არ არსებობს.რუსულია - არ გვინდა კანონი, რუსულია - არ გვინდა ხელისუფლება, რუსულია, რუსულია, რუსულია... ხდება სტიგმატიზება იმ საზოგადოების, რომელსაც უნდა იცოდეს, თუ რა ხდება უცხოური დაფინანსების მიღმა. ამ ტენდენციას მივყავართ იქამდე, რომ მალე გვეტყვიან, რუსულია მართლმადიდებლობა და არ გვინდა, თანაც აქამდე მისვლის პროცესი ფაქტობრივად დაწყებულია: რუსულია 7 იანვარს შობის აღნიშვნა და არ გვინდა, რუსულია ნეტარი მატრონა და არ გვინდა (წმინდანი და ეროვნება ვინ გაიგონა?!). ცოტაც და გვეტყვიან, რომ მართლმადიდებლობაც რუსულია და ამიტომ მასზეც ვთქვათ უარი. ამ მარაზმსაც მოეძებნება ზომბები. ამიტომაა საჭირო საზოგადოების გამოფხიზლება, სანამ ეშმაკი დაეპატრონება მათ სულებს და იზეიმებს გამარჯვებას. იმედი ვიქონიოთ, რომ უფლის შეწევნით საზოგადოების ჯანსაღი ნაწილის სინერგია ამისგან დაგვიცავს და დაგვიფარავს, მაგრამ ამისათვის თითოეულის ძალისხმევაა საჭირო.“-წერს ნანა კაკაბაძე.

სამართალი • 1714029175

რუსთავის N1 პოლიკლინიკის დირექტორმა და ექიმმა ეგვიპტის მოქალაქეს, 2000 დოლარის სანაცვლოდ, ყალბი ცნობა დაუმზადეს - დაკავებულია ერთი პირი

სახელმწიფო უსაფრთხოების სამსახურის თანამშრომლებმა, გატარებული ოპერატიულ-სამძებრო და საგამოძიებო მოქმედებების შედეგად, ჯგუფურად კომერციული მოსყიდვის ფაქტზე ერთი პირი დააკავეს, ხოლო ერთი პირი ამხილეს, - ამის შესახებ ინფორმაციას სახელმწიფო უსაფრთხოების სამსახური ავრცელებს.მათივე ინფორმაციით, საქმეზე ჩატარებული გამოძიებით დადგენილია, რომ კერძო სამკურნალო დაწესებულება შპს „ქ. რუსთავის N1 პოლიკლინიკის“ დირექტორმა ი.ნ-მ და ამავე პოლიკლინიკის ექიმმა მ.წ-მ, ეგვიპტის არაბთა რესპუბლიკის მოქალაქეს, რომელიც საქართველოში ბინადრობის უფლების ვადის გასვლის გამო დეპორტაციას ექვემდებარებოდა, 2000 აშშ დოლარის სანაცვლოდ, დაუმზადეს ჯანმრთელობის მდგომარეობის შესახებ ყალბი ცნობა, ფორმა N100, რომელშიც დააფიქსირეს სხვადასხვა არარსებული დაავადება, რაც ხელს შეუშლიდა შესაბამის სამსახურებს განეხორციელებინათ პირის ქვეყნიდან გაძევება.გამოძიება წინასწარი შეთანხმებით ჯგუფის მიერ კომერციული მოსყიდვისა და ყალბი ოფიციალური დოკუმენტის დამზადება-გასაღების ფაქტზე მიმდინარეობს საქართველოს სისხლის სამართლის კოდექსის 221-ე მუხლის მეოთხე ნაწილის „ა“ ქვეპუნქტითა და 362-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 4-დან 6 წლამდე ვადით.გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს. გამოძიების მიმდინარეობისას შესაძლოა გაფართოვდეს დამნაშავე პირთა წრე.

საზოგადოება • 1714028712

Le Figaro - „საქართველოში სრიალი ეგზოტიკური, ხელმისაწვდომი და თავგადასავლებით სავსეა“

პოპულარული ფრანგული გამოცემა Le Figaro საქართველოს ტურისტული პოტენციალის შესახებ სტატიას აქვეყნებს. გამოცემის ჟურნალისტმა მეთიუ როსმა საქართველოში ტურიზმის ეროვნული ადმინისტრაციის პრესტურის ფარგლებში იმოგზაურა. მეთიუ როსი სვანეთში ფრი-რაიდის მსოფლიო ტურს დაესწრო და საქართველოს სამთო კურორტები დაათვალიერა.„კავკასიაში მდებარე ამ პატარა ქვეყანას პოპულარულ სათხილამურო მიმართულებად ჩამოყალიბების დიდი პოტენციალი აქვს. ქართველები სტუმართმოყვარეები არიან, ფასები ხელმისაწვდომია და მთები კიდევ შესანიშნავი. ვინ იფიქრებდა საქართველოში სათხილამუროდ წამოსვლას? თუმცა სვანეთში, თეთნულდზე ფრი-რაიდის მსოფლიო ტურის ჩატარებით საქართველო პროფესიონალ მოთხილამურეთა რუკაზეა წარმოდგენილი და უკვე ცდილობს მოთხილამურეთა დიდი ნაკადის მოზიდვას“-წერს Le Figaro-ს ჟურნალისტი.მეთიუ როსი აღწერს კავკასიონის მთებს, მესტიის, ჰაწვალის, თეთნულდის,  გუდაურის, ბაკურიანის, გოდერძის სამთო კურორტების ინფრასტრუქტურას, სერვისებს, ფასებს და  საჰაერო მარშრუტებს თუ როგორ შეიძლება ევროპული ქალაქებიდან საქართველოში მოხვედრა.https://www.lefigaro.fr/voyages/guides/skier-en-georgie-une-aventure-exotique-et-accessible-20240318 

პოლიტიკა • 1714028233

„საზოგადოება ქართული“ - რადიკალური პოლარიზაცია, სიძულვილის ენა და ურთიერთმიუღებლობა ანგრევს ერთიან ქართულ ცნობიერებას

რადიკალური პოლარიზაცია, სიძულვილის ენა და ურთიერთმიუღებლობა ანგრევს ერთიან ქართულ ცნობიერებას , - ამის შესახებ "საზოგადოება ქართულის" განცხადებაშია აღნიშნული."საზოგადოებრივი გაერთიანება "ქართული" ახლახან დაფუძნდა და ჩვენს პირველივე მიმართვაში იმ საფრთხეებზე გავამახვილეთ ყურადღება, რომელთა სიმწვავე ცხადად გამოჩნდა "უცხოური გამჭვირვალობის შესახებ" კანონპროექტის განხილვისას.ჩვენ ვწერდით, რომ დამაზიანებელია ურთიერთსიძულვილისა და ერთმანეთის მიუღებლობის ის ატმოსფერო, რომლითაც წლებია გაჯერებულია ტელეეთერები, სოციალური ქსელები და საზოგადოებრივი ცხოვრების არაერთი სფერო. კანონპროექტის განხილვამ კიდევ ერთხელ აჩვენა, რომ პოლარიზებული ნეგატიური ველი ცდილობს ყველა და ყველაფერი დაპირისპირებაში ჩაითრიოს. ამის ნათელი მაგალითია დაშინების და შეურაცხყოფის ის აგრესიული კამპანია, რომელიც იმ ადამიანების მიმართ მიმდინარეობს, რომელთა შრომა და საქმიანობა საერთო ქართულს ემსახურება. ესენია სპორტსმენები და ხელოვანები, რომლებიც საერთაშორისო არენაზე საქართველოს წარმოადგენენ და ქვეყნის ღირსებას იცავენ. მათი, ასევე ჩვენი სახელოვანი მეცნიერების, პედაგოგების, მწერლების და სხვა ინტელექტუალების წრეგადასული დამუნათება და რომელიმე მხარეს გადაბირების მცდელობები, არის მიუღებელი ერთიანობისთვის.ქვეყნის მომავლისა და ქართული დემოკრატიისათვის არანაკლებ დამაზიანებელია "იმედის" თუ სხვა ტელეკომპანიების ჟურნალისტების დევნისა და მათთვის პროფესიული მოვალეობის შესრულებისთვის ხელის შეშლის მზარდი ტენდენცია, ჟურნალისტების და მათი ოჯახის წევრების ბულინგის კამპანიები სოციალურ ქსელებში. სამწუხარო ისაა, რომ ეს იმ ძალებისა და ადამიანების მხრიდან იმართება, რომლებიც ევროპელობაზე ყველაზე მეტად დებენ თავს.ჩვენთვის მიუღებელია განსხვავებული აზრის შეუწყნარებლობის ასეთი რადიკალური გარემო, როცა, სიტყვის თავისუფლების ნიღბით, ადგილი აქვს აშკარა დაშინებისა და მუქარის ფაქტებს. მათ შორის, ჩვენი საზოგადოების წევრების მიმართ, რომლებიც ღიად აფიქსირებენ თავიანთ მოსაზრებებს. თუ კიდევ განმეორდა მუქარები ჩვენი წევრების მისამართით, მათ სათანადო სამართლებრივი პასუხი გაეცემა, რათა საზოგადოება იმ ადამიანებისგან დავიცვათ, ვინც სხვისი დაშინებით განსხვავებული აზრის ჩახშობას ცდილობს.დღევანდელი პროცესების შემხედვარეთ, ასევე გვრჩება შთაბეჭდილება, რომ ზოგიერთი თავისუფლებას ბატონის შეცვლასთან აიგივებს, ხოლო ევროპის ოჯახში გაერთიანებას-საკუთარ სუვერენიტეტზე უარის თქმასთან. ასეთი მენტალობის ადამიანები სიტყვიერად ემიჯნებიან წარსულს, საქმით კი პირდაპირი მემკვიდრეები არიან 20-იანი წლების იმ კომკავშირლების, რომლებიც ტაშით დახვდნენ პროლეტარულ რევოლუციას და რუსულ ოკუპაციას.სხვას რას უნდა მივაწეროთ ის ფაქტი , რომ ზოგიერთისთვის ილიასეულ ტრიადაში-მამული, ენა და სარწმუნოება, ეს უკანასკნელი ზედმეტი აღმოჩნდა, რაც არაა შემთხვევითი მოვლენა ან მხოლოდ უცოდინარობა. ეს თავისუფლების ე.წ. ნეოლიბერალური დოქტრინის ნაწილია, რომელშიც უღმერთობა ტოტალიტარული რელიგიის რანგშია აყვანილი. ამიტომაა, რომ ამ ინსპირაციის შემოქმედი ხალხი, გარე ძალების კარნახითა და ხელშეწყობით, წლებია გამიზნულად ებრძვის ოჯახის ინსტიტუტს, ქრისტიანობას, დასცინის წმინდანებს, აქილიკებს ასი ათასი მოწამის თავგანწირვას, რევიზიას უკეთებს ისტორიას, აკნინებს და უნდა წაშალოს ჩვენი მეფეების, მღვდელმთავრების, საზოგადო მოღვაწეების და პატრიარქის ღვაწლი, ავტორიტეტი ჩვენი ეკლესიისა, რომლის დამსახურება ქართველი ერისა და კულტურის წინაშე აუწონელია.ჩვენ ისტორიულად და კულტურულად ვართ ევროპელები და ევროპელობა, უპირველეს ყოვლისა, განსხვავებული აზრებისა და არგუმენტების ჰარმონიული სინთეზია და არა ტოტალიტარული აზრის ერთფეროვნება. ჩვენ გვინდა გავხდეთ ევროპული ოჯახის წევრი, მაგრამ ეს არ უნდა მოხდეს ჩვენი იდენტობის, ქრისტიანული ტრადიციების, ისტორიის, ღირსებისა და სუვერენიტეტის ხარჯზე. ეს უკანასკნელი დღეს, ურთულესი გეოპოლიტიკური გამოწვევების პირობებში, ჩვენი სახელმწიფოებრიობისა და ერის ფიზიკური გადარჩენის მთავარი ბერკეტია და მის განმტკიცებაზე ყველამ უნდა ვიზრუნოთ იქნება იგი კონსერვატორი, ლიბერალი, სოციალისტი თუ რომელიმე სხვა იდეოლოგიის მიმდევარი.საერთო ეროვნული ინტერესები მათზე მაღლა დგას და ამისთვის ჩვენ, პირველ რიგში, განსხვავებული აზრების შეჯერებისა და კომპრომისების გზით, უნდა დავძლიოთ რადიკალიზებული და პოლარიზებული პოლიტიკური გარემო, რათა საზოგადოებაში ეროვნული და სახელმწიფოებრივი საქმეების ერთად კეთების ატმოსფერო დავამკვიდროთ“, - აღნიშნულია განცხადებაში.