17:55 | 2020-09-07 ავტორი: თამარ ბოჭორიშვილი

“მე გავიგიჟე თავი, ქორწილი ვენახში მინდოდა” – ვინ არის წყვილი, რომლის ქორწილზეც ყველა ლაპარაკობს

“მე გავიგიჟე თავი, ქორწილი ვენახში მინდოდა” – ვინ არის წყვილი, რომლის ქორწილზეც ყველა ლაპარაკობს

რამდენიმე დღეა სოციალურ ქსელში კახეთში გადაღებული ფოტოები ვრცელდება. ფოტოები ახალგაზრდა წყვილის ელენე ზაუტაშვილის და ალექსანდრე დეკანოსიძის ქორწილში არის გადაღებული. საზოგადოების ყურადღება კი იმით მიიპყრო, რომ ულამაზესი საქორწინო სუფრა არც მეტი არც ნაკლები, პირდაპირ ვენახში იყო გაშლილი.

 

საქორწინო წვეულების ორგანიზატორი ცნობილი ივენთ-მენეჯერი თაკო დოლაბერიძე და ნინო კიკალიშვილი გახლდათ. წვეულების გაფორმებაზე ანი პირველმა და მარიკა დანელიამ იზრუნეს.

 

„პრაიმტაიმი“ თაკო დოლაბერიძეს ესაუბრა.

 

– როგორც იქნა მოიხსნა შეზღუდვები და შეგვიძლია წვეულებების ჩატარება. ოღონდ ერთი პირობით, ყველა რეგულაცია ზედმიწევნით ზუსტად უნდა იყოს დაცული. სტუმრებმა უნდა გაიარონ თერმოსკრინინგი და ა.შ.

 

ჩემი აზრით ქორწილებში და დაბადების დღეებზე, სტუმრების რაოდენობა კორონავირუსის გამოჩენამდეც უნდა შეზღუდულიყო, რადგან ქართველები ყველა ერთმანეთს იცნობს და ვისაც იცნობ აუცილებელი არ არის ყველა დაპატიჟო.

 

ქორწილის სტუმრებს შორის ყოფილი მაღალჩინოსნებიც იყვნენ

 

ასეთ დროს სტუმრებიც უფრო კარგად ერთობიან და წვეულებებიც საინტერესო ხდება.

 

– თაკო, ცნობილია რომ კარანტინის გამოცხადების შემდეგ არაერთი დაგეგმილი ღონისძიება გაგიუქმდათ, ახლა დაიწყეთ ეტაპობრივად მათი ჩატარება?

 

– მე მქონდა ღონისძიებები შეკვეთილი რუსეთიდან, უკრაინიდან და ევროპიდან. შესაბამისად სანამ ფრენები სრულად არ აღდგება, ჩაშლილ ივენთებს ვერ ავანაზღაურებ.

 

ერთ-ერთ უმსხვილეს უკრაინულ კომპანიას, სურდა რამდენიმე დღიანი კორპორატიული ღონისძიება ჩაეტარებინა საქართველოში. ჯერ თბილისში, შემდეგ სვანეთში, ბათუმში და ბორჯომში გვქონდა დაგეგმილი მათთვის ღონისძიებები, მაგრამ ჩაიშალა.

 

დაახლოებით 15 ასეთი ღონისძიება გამიუქმდა, სადაც უამრავი ადამიანი იქნებოდა დასაქმებული.

 

უცხოელებს ძალიან მოსწონთ საქართველო, ის ინფრასტრუქტურა და მომსახურება რაც ჩვენთან ხვდებათ, სხვა ქვეყნებთან შედარებით ძალიან იაფია, ამიტომაც ირცევენ საქართველოს ხშირად.

 

პატარძალი ელენე ზაუტაშვილი

 

– რამდენიმე დღის წინ, სოციალურ ქსელში საქორწინო სუფრის ფოტოები გავრცელდა, გვიამბეთ ამ ულამაზესი ქორწილის შესახებ?

 

– ეს ქორწილი შედგა კახეტში, სოფელ ხაშმში „მტევინოში“. ეს ულამაზესი ადგილი ჩემმა მეგობარმა, მეღვინე ნიკა ზაუტაშვილმა შექმნა. უამრავი პროექტი ჰქონდა დაგეგმილი, მაგრამ პანდემიამ ხელი შეუშალა, ამიტომ როგორც კი შეზღუდვები მოიხსნა, პირველ ღონისძიებად მისი ქალიშვილის ქორწილი დაიგეგმა.

 

ჩემი იდეა იყო საქორწინო სუფრა ვენახებში გაგვეშალა, თავი გავიგიჟე – ელენე და ალექსანდრეც დამთანხმდნენ ამ წინადადებაზე. შესაბამისად ულამაზესი ქორწილი შედგა, ამონათებული იყო ვენახები და ფეიერვერკებიც იქ გაუშვეს.

 

საქორწინო სუფრის გაფორმებაზე არაჩვეულებრივმა დიზაინერებმა ანი პირველმა და მარიკა დანელიამ იზრუნეს.

 

დიზაინერი ანი პირველი

 

ევროპული მენიუ და მომსახურება გვქონდა. სტუმრების განწყობაზე სალომე კორკოტაშვილმა, რომა რცხილაძის ბენდმა, დათო გომართელმა და თემო რცხილაძემ იზრუნა. ასევე მოწვეული გვყავდა „ბოშები“, რომლებმაც ცეცხლოვანი შოუ შესთავაზეს სტუმრებს.

 

ქორწილში სულ 100 კაცი იყო დაპატიჟებული და ყველას ჩაცმულობაზე დიზაინერმა დათუნა სულიკაშვილმა იზრუნა.

 

საღამოს ბოლოს ტორტიც გაიჭრა, რომლის დიზაინზეც ელიტარულმა კონდიტერმა დავით გორგოშაძემ იზრუნა.

 

 

 

ავტორი: თამარ ბოჭორიშვილი

0
კომენატარი - +

X