fbpx
19:42 | 2020-11-14 ავტორი: Prime Time

„დავიწყებული ხილის ხეივანი“ – თბილისს კიდევ ერთი მწვანე სივრცე შეემატება

„დავიწყებული ხილის ხეივანი“ – თბილისს კიდევ ერთი მწვანე სივრცე შეემატება

საქართველოს ეროვნულ ბოტანიკურ ბაღში, ტონინო გუერას სახელობის „დავიწყებული ხილის ხეივნის“ მოწყობის მიზნით, დღეს, ნერგები დაირგო.

 

„გამწვანების ღონისძიებაში, თბილისის მერის მოადგილე ანდრია ბასილაიასთან ერთად, საზოგადოებისთვის ცნობილი სხვადასხვა სფეროს წარმომადგენლები და იმ ადამიანების შთამომავლები მონაწილეობდნენ, რომელთა სახელობის მცენარეებიც დაირგო. ღონისძიებას, ასევე, ესწრებოდა იტალიის ელჩი საქართველოში – ენრიკო ვალვო.

 

თბილისში, „დავიწყებული ხილის ბაღის“ ანალოგის გასაშენებლად, ტონინო გუერას მეუღლემ, ლორა გუერამ, საქართველოს უსასყიდლოდ გადმოსცა ნერგების ის ჯიშები, რომლებიც იტალიურ ბაღშია გაშენებული. ამასთანავე, შემდეგი ეტაპისთვის, დაგეგმილია, ბაღი გაჯერებული იყოს იმ ქართული, ენდემური მცენარეების ჯიშებით, რომლებიც პრაქტიკულად, დავიწყებულია.

 

იტალიაში, ემილია რომანიას რეგიონში, ქალაქ პენნაბილლიში „დავიწყებული ხილის ბაღი“ ჩვენი ქვეყნის მეგობარმა, იტალიელმა პოეტმა, დრამატურგმა და სცენარისტმა ტონინო გუერამ შექმნა. ბაღში მცენარეთა დავიწყებული ჯიშები დაირგო. ამასთან, თითოეული მცენარე სხვადასხვა ხელოვანის სახელობისაა.

 

ეს პატარა ბაღი გაშენებისთანავე მისი იდეის გამო მოექცა საზოგადოების ყურადღების ცენტრში. ამ მცენარეთა დავიწყებული ჯიშები მიუთითებენ კულტურისა და ხელოვნების მარადიულობაზე, ხაზს უსვამენ კაცობრიობის ისტორიული მეხსიერების მნიშვნელობას და წარმოაჩენენ თანამედროვე საზოგადოების წამყვან როლს, ფლორისა და ფაუნის დაცვისა და მოვლა-პატრონობის საქმეში“ – ინფორმაციას თბილისის მერია ავრცელებს.

 

 

ავტორი: Prime Time

0
კომენტარი - +

სხვა სიახლეები

X