00:32 | 2020-07-05 ავტორი: მირანდა ტყემალაძე

„არავის უხსენებია ის, რომ სპორტის მასწავლებელი სოფის დასახმარებლად წყალში გადახტა“- სკოლა „ალბიონის“ განცხადება

„არავის უხსენებია ის, რომ სპორტის მასწავლებელი სოფის დასახმარებლად წყალში გადახტა“- სკოლა „ალბიონის“ განცხადება

სკოლა „ალბიონის” XI (I) კლასის სახელით განცხადება ვრცელდება, რომელსაც უცვლელად გთავაზობთ:

 

„ბოლო დღეებში განვითარებულმა მოვლენებმა დაგვანახა, რომ ამ სიტუაციაში აუცილებელია ჩვენი პოზიციის დაფიქსირება სოფი ნიკოლეიშვილის გარდაცვალებასა და ჩვენი სკოლის ორი მასწავლებლის დადანაშაულებასთან დაკავშირებით.

 

პირველ რიგში გეტყვით, რომ მთელმა კლასმა განვიცადეთ ის უბედურება, რომელიც შარშან, 26 მაისს დატრიალდა. ყველა ასე თუ ისე ვიცნობდით სოფის, მუდამ ვხედავდით მოცინარს და მომღიმარს და ჩვენთვის ძნელად დასაჯერებელი იყო ის, რაც მოხდა…

 

კიდევ ერთხელ ვუსამძიმრებთ სოფის ოჯახს და ახლობლებს. გვესმის თქვენი, რომ ცდილობთ, სამართლის მიღწევას და გინდათ, რომ დამნაშავე დაისაჯოს. თუმცა ჩვენ, როგორც ალბიონელები, როგორც სოფის ნაცნობები, როგორც რიგითი მოსწავლეები და სოფის თანატოლები, ვფიქრობთ, რომ პედაგოგების დადანაშაულება სულაც არაა სამართლიანი.

 

2020-07-01"რომ ჩაგისვით ავტობუსში, უკან რატომ არ მომიყვანეთ, რა სინდისით გძინავთ?!" - ექსკურსიაზე გარდაცვლილი გოგონას დედა

 

ბრალდების ფორმულირება: „გულგრილობა“ საერთოდ წარმოუდგენელია ჩვენთვის ამ ორ ადამიანზე, ჩვენთვის საყვარელ პედაგოგებზე. არც ერთ ადამიანს არ უხსენებია ის, რომ სპორტის მასწავლებელი სოფის დასახმარებლად წყალში გადახტა, თუმცა იმის შემდეგ, რაც მისი სიცოცხლეც საფრთხის ქვეშ ჩავარდა, თოკით ამოიყვანეს.

 

კარგად გვახსოვს, როგორ კოჭლობდა რამდენიმე თვის განმავლობაში. რაც შეეხება ნელი მასწავლებელს, ის ძალიან მძიმე მდგომარეობაში იყო. იმ დღის ყველა დეტალი სოფის კლასელებმა დაწერეს და გამოაქვეყნეს, რათა საზოგადოებას სიმართლე გაეგო.

 

რაც შეეხება ჩვენს (შესაძლოა, სუბიექტურ) მოსაზრებას, ვფიქრობთ, რომ პროკურატურა შეცდომაში შევიდა. ვფიქრობთ, არც ერთი ადამიანი, რომელსაც შეხება ჰქონდა ამ ორ მასწავლებელთან, ვერ იტყვის იმას, რომ ბრალდება სამართლიანია და ისინი მართლაც გულგრილად შეხვდნენ სოფის ამბავს.

 

ჩვენ ბოლომდე გვჯერა იმის, რომ გამოძიება არაა სამართლიანი და დამნაშავე ადამიანებს სინამდვილეში სხვაგან უნდა ვეძიოთ. ჩვენ ვიცნობთ ორივე მასწავლებელს და დარწმუნებული ვართ, რომ ისინი საზოგადოებისგან ასეთ შეურაცხმყოფელ სიტყვებს არ იმსახურებენ!

 

პატივისცემით, სკოლა “ალბიონის” მე-11 კლასი”, – ნათქვამია განცხადებაში.

 

შეგახსენებთ, რომ პროკურატურამ სკოლა „ალბიონის“ 2 პედაგოგს გულგრილობის ფაქტზე, რამაც ადამიანის სიცოცხლის მოსპობა გამოიწვია, ბრალდება წარუდგინა.

 

ექსკურსიაზე დაღუპული მოზარდის საქმეზე პედაგოგები ბრალს არ აღიარებენ.

 

წყარო: mshoblebi.ge

ავტორი: მირანდა ტყემალაძე

0
კომენატარი - +

X